韓國海鮮蔥餅

喺尖沙咀韓國街既小店買咗呢盒海鮮蔥餅，係因為之前喺韓國食過好好食，見有現成既就買黎試下啦，試後覺得味道OK，但料太少，好彩自己落多咗蔥，如果唔係就似食粉皮多D咯!

Staub

Staub我估都唔駛多介紹，新入手咗兩個，之前完全未用過鑄鐵鍋，只覺好靚同好重，但上網睇下人地介紹，收集下資料，原來真係幾好架喎，咁就極力游說我先生，佢終於都買咗比我，用後只可以講一句〝識用就會覺得好好用〞，因為頭兩星期完全掌握唔到，煮咩都〝痴〞晒底，但當你同個煲溝通耐咗，有咗感情時，你就會發覺佢真係一個好幫手！

 

西班牙黑毛豬午餐肉

呢排愛上咗去大埔街市梁九記掃貨，見網上好多人都話呢隻西班牙黑毛豬午餐肉好正，就買黎試下，食後感係好香好彈牙，而且價錢唔貴，只需要三十元，話晒都西班牙，而家喺超級市場買一盒大陸既都要十零廿蚊啦，所以係抵食，值得推介既!

南瓜排骨

呢味餸係我先生教我整既，簡單又好味，大家不妨一試!

 

材料 :

 

中國長形南瓜 ................. 1/4舊

排骨.................. 30元

 

醃料 :   豉油、生粉、糖

 

調味 :   鹽

 

步驟：

 

1)  將南瓜洗淨，切粒

2)  排骨醃大約20分鐘

3)  預熱鍋、下油，煎香排骨

4)  將南瓜一併放入鍋內及加水

5)  加小許鹽

6)  加蓋轉小火煮約15分鐘

7) 熄火後再焗約5分鐘

 

 

小貼士：南瓜不要切太細粒，因煲後南瓜溶，太細會唔見晒D南瓜，除非你鍾意食南瓜蓉啦!

 

 

蒜蓉蒸茄子

 

蒜蓉蒸茄子，第一次整呢個餸，原來都好方便，下次放埋粉絲落去一齊蒸，應該會仲好味！

材料 :

茄子 ............ 1條
蒜頭 ............ 數粒 (隨自己喜愛)
乾蔥 ............ 1粒

步驟 :

1) 茄子洗淨，切條後用鹽水浸住待用，因茄子會變色，所以需要浸
2) 將乾蔥切細，蒜頭切粒
3) 用食油、鹽及麻油(麻油係我自己鍾意所以加既)撈落切好既乾蔥同蒜粒度
4) 茄子於碟上排好，將撈好既調味舖喺茄子上
5) 水滾後蒸10分鐘左右

黃金酥餅

食咖哩最正就係加埋酥餅黎食架喇，搣一小塊酥餅，點滿咖哩汁放入口，嘩....正到不得了！喺街食咖哩就多數都有得配埋啦，但如果喺屋企食又點呢???

 思念牌酥餅

 

 

 方便又快趣

 

試過幾隻喺超市買既酥餅，呢隻算係最似喺街食既、無咁油既、最易煎既一隻。

 

小貼士 : 一路煎一路不停咁將酥餅反黎反去，咁樣燶同脆既位就會平均啲，如果諗住煎完一面到一面，就會比較易燶！

南瓜雪耳湯

近排秋風起，又乾燥，喉嚨乾涸痕痕癢，皮膚都開始乾起黎，係時候煲返D湯潤一潤，南瓜雪耳湯就真係最好最潤喇！

南瓜雪耳湯

小貼士 :

加入章魚會令成煲湯鮮甜得多。

炒南瓜

NaNa好鍾意食南瓜，貪佢甜甜地，又有營養，將南瓜撈埋飯一齊食，真係飯都食多碗呀！

材料 :

中國長形南瓜 (1/4個)

調味 :

鹽 (少許)


步驟 :
1) 將南放入熱油炒
2) 加水，加蓋煮至南瓜軟身
3) 加少許鹽吊一吊味即可上碟

小貼士:
唔好將南瓜煮到南瓜溶咁，煮到南瓜外軟內爽，令其更有層次感。

光波爐之風乾多春魚

Na Na屋企養咗幾隻狗狗，喺我未鍾意煮野食既時候，耐唔耐都會整下野比我D小朋友食既，貪佢地唔會彈我，整咩比佢地食，佢地都係食得咁開心麻，而今次就用光波爐幫幫手，整個風乾多春魚比佢地試下。

 

 

 

步驟 :

 

1) 洗淨多春魚後，用廚房紙巾將魚身既水份印乾

2) 預熱光波爐約五分鐘

3) 將魚平放在低架上，魚與魚之間需留有空位，因魚身熟時會黏埋一齊

4) 將光波爐較100~125度，二十分鐘

5) 完成後再將每條多春魚反身，較100~125度，二十分鐘

6) 重複4及5既步驟至魚變乾及完全失去水份便可

 

小貼士 :

因風乾需時，但不要因心急而將度數較高，因高度數會令魚燒焦，如魚身未乾透的話，就會好容易發霉，令保存時間縮短。一盒多春魚我大約光了三小時左右，所以如需要整呢個小食，就需要預半日時間留喺屋企喇!

 

 

 

 

 

 

煙肉乾

用黎炒意粉最一流，好香，喺熱油度落煙肉乾炒香先再落意粉，正到爆呀！或者喺完成左既美食上加煙肉乾又得，用黎整沙律又得，真係好好用架！

冠益華記咖哩粉、咖哩油

呢隻咖哩有分油同粉，油就真係好油下架，所以我比較鍾意用粉多啲，唔係度度有得買架，所以見到要買多兩支呀！

咖哩魚蛋魷魚豬皮

整呢個小食好簡單，好過出去食，而家一串咖哩魚蛋閒閒地都10蚊，自己整又平又無味精，好呀！

材料幾多隨自己口味，自己想食幾多啦！

醃料：咖哩粉（一湯匙）、紹興酒、糖、生抽、麻油

步驟：
1)  將食材洗淨
2) 豬皮用水浸十分鐘左右
3) 魷魚用醃料醃大約一小時
4) 將煲加熱，下油，爆香乾蔥及蒜頭，   再將醃好既魷魚放落煲炒香後加水
5) 魚蛋、豬皮放埋落煲
6) 中火煲十分鐘左右，熄火，加蓋焗廿分鐘即可

小貼士： 如果想更加入味，可以攤凍後放入雪櫃，第二日叮返熱黎食，仲正呀！

未開始寫煮野食前，要寫下買食材先

梁九記

呢間野我係喺網上面見人講得多，又話D野好平好抵，又有好多特別既食材買，所以我都不禁去咗朝聖，果然........好平.....好多難喺大型超市及街市可以買到既野...同埋.........好....多.....人！不過一場去到就緊係要博咗條老命去摷好野啦，點可以空手而回架！

第二次買返黎既收穫

呢兩個月我都去咗兩次，對呢間野真係又愛又恨呀，愛....佢D野平靚正，恨....佢D野咁平靚正做咩?我得兩隻手，點拎呀????

黎緊都諗住再去入貨，希望買到多D特別野啦!

BLOG

好多年無寫過BLOG，見近期我愛上最整野食，又想寫返，希望可以同其他BLOG友交流下心得，又可以寫底D煮野食既步驟，第日唔記得都可以上黎當食譜咁用麻!